Piepklein jellievis dood amper matroos
2010-01-11 14:21
Sydney - 'n Matroos is onverwags deur 'n dodelike jellievis gebrand terwyl hy van 'n vragskip af visgevang het.
Australiese amptenare het Maandag bekendgemaak dat die klein irukandji jellievis die man getref het terwyl die vragskip in die see noord van Australië gevaar het.
Die sentrale Queensland helikopter-reddingsdiens sê hulle is nie seker of die man die jellievis, wat die grootte van 'n klein vingernael is, ingekatrol het, en of dit met 'n fratsgolf op hom gespat het nie.
"Daar het water in sy gesig gespat, maar ek weet nie of dit in dié water was nie," het 'n woordvoerder van die reddingsdiens gesê. "Dit kon iets gewees het wat hy ingekatrol het."
Die man, wat 'n uur lange vlug van die Queensland kuslyn af was, was ongeveer 25 meter bo die watervlak toe hy deur die giftige seedier gebrand is.
"Realisties gesproke, wat is die kans om deur 'n jellievis gebrand te word terwyl jy veilig aan boord 'n vragskip, 25 meter bo die water is? Dit is regtig ongelooflik," het Geoff Abrahams, 'n bemanningslid van die reddingspoging, gesê.
Daar is geen teengif teen die irukandji se brand nie, en 'n slagoffer mag dalk nie onmiddelik die pyn voel voordat hy of sy simptome begin wys nie.
Die matroos het egter oorleef, en is in 'n stabiele toestand in die hospitaal.
Die simptome sluit spierpyn, naarheid, 'n vinnige toename in bloeddruk en soms selfs hartversaking in.
–Sapa-AFP