Paar drankies verhoog klaar kans op borskanker
2011-11-02 11:12
New York – Vroue wat so min as drie alkoholiese drankies per week drink het ‘n effens groter kans om borskanker te ontwikkel as vroue wat glad nie drink nie.
Die bevindinge van 'n studie van meer as 100 000 vroue is die eerste om te bewys selfs vroue wat baie matig drink, kan hul kanse op borskanker verhoog.
Vroue wat tussen drie en ses drankies per week geniet het, het ‘n 15% groter kans om borskanker te ontwikkel as vroue wat geheelonthouers is.
Die navorsing bied beduidende bewyse, want vroue is oor 'n tydperk van 30 jaar bestudeer, het die navorsers gesê.
Daar bestaan egter slegs ‘n verband tussen alkoholgebruik en borskanker – navorsers het benadruk daar is geen bewyse dat alkohol die siekte veroorsaak nie.
Die bevindinge geld egter nie vir vroue wat met tye baie drink en dan weer baie min drink nie, het die hoofnavorser, Wendy Chen van die Harvard-universiteit in Amerika, gesê.
“Niemand behoort oor ‘n week waarin hul meer as gewoonlik drink, skuldig te voel nie,” het sy gesê.
Haar navorsing is in die Journal of the American Medical Association gepubliseer.
– Volg Nuus24 op Twitter.
- AP