Outisme het komplekse wortels
2010-06-11 01:51
Londen – Die wêreld se grootste skandering van mense met outisme in hul families het gevind dat talle pasiënte hul eie unieke patroon van genetiese mutasies het wat nie noodwendig geërf is nie.
Die bevindings, wat in die joernaal Nature gepubliseer is, help om die sterk rol wat gene in outisme speel, te bevestig.
Die studie stel ook voor dat klein genetiese ontwrigtings in die ouers se eiers en sperm kan begin.
“Deur die genetiese oorsake van outisme te identifiseer, hoop ons dat ons in die toekoms die diagnose en behandeling van hierdie toestand wat soveel kinders en hul families affekteer, kan verbeter,” het Tony Monaco van die Wellcome Trust Centre for Human Genetics by die Universiteit van Oxford, gesê.
Outisme is ‘n kompleks en raaiselagtige toestand van die brein. Die eienskappe van die toestand sluit moeilikheid met sosiale interaksie en kommunikasie, in. Mense met outisme vind dit ook moeilik om ander se emosies en optredes te verstaan.
Die projek het die gene van 996 mense met outisme bestudeer asook die gene van 1 287 mense wat nie aan die toestand ly nie.
Wat die bevindings ingewikkeld maak is dat elke outistiese kind ‘n verskillende ontwrigting in ‘n verskillende geen getoon het.
Die studie beantwoord egter nie hoe die genetiese verandering plaasvind nie.
Volg Nuus24 op Twitter.
- Reuters