Outisme algemeen as ouboet of sus ook ly
2011-08-15 14:05
Seattle – Die broers en susters van outistiese kinders het ‘n groter kans om ook ‘n vorm van outisme te hê as wat vroeër bevind is, het navorsers gesê.
Die studie van meer as 600 driejariges met ‘n outistiese ouer broer of suster het bevind een in vyf van die kinders het ‘n vorm van outisme.
Pediaters moet ‘n ekstra oog oor hierdie kinders hou, selfs as kleuters, het die navorsers gesê.
Vroeë ingryping en terapie kan dié kinders se simptome tot ‘n minimum beperk, het hulle bygevoeg.
“Ons weet ‘n jong brein is meer vatbaar vir verandering,” het die hoofnavorser, Wendy Stone, van die Universiteit van Washington, gesê.
Die navorsing is in die mediese joernaal Pediatrics gepubliseer.
Medici het voorheen geskat tussen 3% en 14% van die broers of susters van outistiese kinders is ook outisties.
– Volg Nuus24 op Twitter.
- Reuters