Ouderdom in die gene, meen navorsers
2010-07-02 13:38
Washington – Dit wil voorkom asof die van ons wat die oudste word, ons ouers goed gekies het.
Navorsers het gevind dat mense wat besonders oud word sekere genetiese ooreenkomste deel.
Dit stel wetenskaplikes egter nog nie in staat om iemand se lewensjare met ‘n vinnige genetiese toets te bepaal nie.
‘n Gesonde lewenstyl en ander faktore speel ‘n beduidende rol, het Paola Sebastiani en Thomas T Perls van Boston Universiteit, wat die studie lei, in hul verslag gesê.
Die navorsing sal wel kan help om te bepaal wie ‘n groter geneigdheid tot die vroeër ontwikkeling van sekere siektes het.
Dié inligting sal op die ou end gebruik kan word om ook die nodige terapeutiese behandelings vroeër te begin.
Die navorsers het die gene van 1 055 mense wat tussen 1890 en 1910 gebore is, bestudeer en met die gene van mense wat later gebore is, vergelyk.
Deur sekere genetiese padwysers te bestudeer, kon wetenskaplikes met 77% akkuraatheid sê wie van die mense ouer as 100 geword het.
Van die honderdjariges se gene het te doen met die persoon se vermoë om te oorleef.
Ander gene help weer om siektes wat normaalweg met ouderdom gepaard gaan, tot ‘n baie latere ouderdom uitstel.
Volg Nuus24 op Twitter.
- SAPA