‘Ou boot’ in Waterfront gevind
2012-02-09 09:02
Kaapstad. – Die oorblyfsels van ’n skip of ’n boot, vermoedelik uit vervloë dae, is Woensdag hier in die V&A Waterfront deur konstruksiewerkers gevind.
Ou kanonkoeëls is ook gevind.
Dit is nog onbekend hoe oud dit is en of enige ander artefakte behoue gebly het.
Die bestuur van die V&A Waterfront het dié aankondiging Woensdag gedoen nadat “mariene oorskot” op ’n bouperseel naby die Kloktoring-kompleks gevind is.
Die Nr.1 Silo-projek, waar die vonds gekry is, sal 18000 m² beslaan en voorsiening maak vir kantore, 800 parkeerplekke, winkels en 30 luukse woonstelle. Dit word as ’n “groen gebou” ontwikkel en die plan is om dit teen middel 2013 klaar te hê.
Volgens Lynette Lambert, woordvoerder van die V&A Waterfront, is die konstruksiewerk aan die Nr.1 Silo-projek tydelik gestop.
Die ontdekking sal sorgvuldig deur ’n maritieme argeoloog bestudeer word.
“Die V&A Waterfront is ryk aan geskiedenis en dit is nie die eerste keer dat ons werklik boeiende ontdekkings maak wat deel van Kaapstad se erfenis is nie.
“Eers wanneer die argeoloog se verslag ontvang is, sal oor verdere stappe besluit word,” het Lambert gesê.
Die oorblyfsels lê op een gedeelte van die terrein wat Woensag afgesper is.
Volgens ’n studie wat dr. Bruno Werz, ’n argeoloog en historikus, gedoen het, het daar tussen 1610 en 2006 minstens 360 skepe in Tafelbaai gesink.
Die plekke waar die skepe gesink het, is min of meer bekend. Min ander inligting is egter beskikbaar.
Die getal bekende skeepswrakke net in Tafelbaai is 146.
Werz skryf in dié verslag die meeste van die skepe het weens natuurverskynsels gesink. Die sterk noordwestewinde in die winter het veral ’n groot rol gespeel. Baie skepe het tot op die strand gedryf, of tot waar die kuslyn destyds was.
* ’n Beperkte aantal mediaverteenwoordigers sal Donderdag op die terrein toegelaat word.
Volg Nuus24 op Twitter.
- Die Burger