Ontsnapsimuleerder ’n eerste vir Afrika
2011-10-10 08:59
Kaapstad – Die Suid-Afrikaanse Vloot het ’n splinternuwe duikbootontsnap-simuleerder waarmee duikbootbemanning opgelei word om te ontsnap uit duikbote wat in die moeilikheid beland.
Dit is die eerste simuleerder in sy soort in Afrika en slegs die sewende in die wêreld.
Thabang Makwetla, adjunkminister van verdediging en militêre veterane, het die bekendstelling van dié simuleerder Vrydag by die Simonstad-vlootbasis bygewoon.
Sowat 140 Suid-Afrikaanse duikbootbemanningslede sal jaarliks hier opleiding ontvang.
Die duikboot-simuleeder is geskoei op die Duitse en Sweedse duikboot-ontsnapsimuleerders.
Die tipe 209-duikboot wat in Suid-Afrika gebruik word, is in Duitsland ontwerp en gebou. Suid-Afrikaanse duikbootbemanning het hul opleiding in die ontsnapping uit duikbote in dié land gedoen voordat die vaartuie na Suid-Afrika gekom het.
Luidens ’n verklaring van die vloot werk die bemanning van ’n duikboot in een van die moeilikste omgewings op aarde. “As deel van die streng opleiding, moet elkeen leer om onderwater uit ’n duikboot te kan ontsnap.”
Makwetla het in sy toespraak gesê maritieme misdaad en seerowery maak inbreuk op vrede en die sekuriteit van die land.
“In dié konteks is tegnologiese gevorderde opleiding van deurslaggewende belang.
“Die talle ure wat in opleiding bestee word, verseker nie net hoë vlakke van selfvertroue nie, maar bied ook die nodige sielkundige gereedheidsvlak om in krisistye met die nodige spoed en ratsheid te reageer.”
– Volg Nuus24 op Twitter.
- Volksblad