Onthou, diewe het ook Facebook
2011-01-06 08:32
New York - Foto’s op Facebook het daarvoor gesorg dat rowers ’n Amerikaanse gesin enkele dae ná Kersfees van al hul Kersgeskenke beroof het, berig die nuusblad CBS.
Die pa van dié New Yorkse gesin is Maandag erg aangerand toe twee gemaskerde mans die gesin in hul Deer Park-huis oorval het.
Volgens die polisie het die boewe dalk die gesin se foto’s van hul Kersgeskenke op Facebook gesien en toegeslaan met die doel om elke geskenk te roof.
Die rowers het die ouers en hul drie tienerkinders beveel om hul Kersgeskenke te oorhandig asof hulle ’n lys daarvan gehad het.
“Hulle het my by die voordeur in die huis ingestamp, in die ribbes geskop en oor die kop geslaan,” het die pa, wie se identiteit weerhou word, gesê.
“Hulle wou die Wii, Xbox, Wii-speletjies en juwele hê.”
Die gesin het almal op hul Facebook-mure geskryf wat hulle vir Kersfees gekry het en foto’s daarvan op hul Facebook-profiele gelaai.
“Dit kon iemand gewees het wat ons ken of nie ken nie, wat vriende met iemand anders op Facebook is,” het die pa gesê.
Volg Nuus24 op Twitter.
- Sapa - AFP