Onkeerbare Apple verwag rekord-verkope

2012-10-26 12:43

New York – Apple se verdienste vir die afgelope kwartaal het nie aan ontleders se verwagtinge voldoen nie – maar beleggers verwag steeds dat dié tegnologiereus in die volgende paar maande behoorlik munt gaan slaan uit die vakansieperiode.

Apple het volgens CNN in die kwartaal wat op 29 September geëindig het, 'n wins van $8,2 miljard (R71 miljard) gemaak op verkope van $36 miljard (sowat R315 miljard) – ietwat minder as wat kenners verwag het.

Die maatskappy se vooruitsigte lyk egter beter as ooit. Apple het gesê hy verwag om in die volgende kwartaal 'n verstommende $52 miljard (ongeveer R454 miljard) se ware te verkoop. Dit is sowat 12% meer as verlede jaar.

Indien hy dié verkoopsyfer behaal, sal dit die grootste verdienste ooit deur 'n tegnologiemaatskappy wees. Boonop is Apple bekend daarvoor dat hy dikwels baie konserwatiewe voorspellings maak, en dan heelwat beter presteer.

– Lees hier meer.

– Volg Nuus24 op Twitter.