Ongewone luiperdfoto’s gekiek
2010-06-24 12:55
Wes-Kaap – ’n Luiperd en haar welpie is die tweede keer met ’n sensorkamera gekiek sedert navorsing oor dié diere se gewoontes naby die Cederberg-wildernisgebied aan die gang is.
Die wyfie is danksy ’n kamera van die Kaapse Luiperdtrust bespeur, blyk uit ’n verklaring wat uitgereik is namens die Bushmanskloof-wildernis-reservaat, wat grens aan die Cederberg-wildernisgebied.
Quinton Martins van die trust het gesê dit wil voorkom of dié wyfie (sy heet F12) ’n ander een (F9, of Amber) se loopgebied ingeneem het. Hy het gesê dit is baie ongewoon om sulke foto’s van luiperdwyfies te neem.
Die oorlewingskoers van luiperdwelpies is laag, veral in die uiterste toestande in die Sederberge.
Luiperdwelpies word normaalweg gespeen as hulle ses of sewe maande oud is, maar bly soms by die wyfie tot hulle ouer as ’n jaar is, selfs tot 18 maande.
Die trust se navorsing behels onder meer die gebruik van kameras wat dié roofdiere (Panthera pardus) binne hul onderskeie loopgebiede afneem. Danksy dié foto’s word heelwat inligting oor hul bevolkingsdigtheid, gedragspatrone en verspreiding ontsluit, is vroeër berig. Dié navorsing is deel van ’n groter luiperdstudie. Navorsing hieroor is al geruime tyd in die Sederberge, die Gourits-korridor en Namakwaland onderweg.
In ’n volwasse mannetjie se loopgebied word normaalweg twee of drie wyfies aangetref.
Bushmanskloof skenk geruime tyd reeds geld aan die trust om luiperdnavorsing te bevorder. Sedert die Kaapse Luiperdtrust in 2005 gevestig is, het Bushmanskloof reeds tien satellietsenders (ter waarde van sowat R300 000) vir navorsingsdoeleindes geskenk.
Altesaam 14 luiperds is reeds met sulke senders toegerus, waarvan twee in die Bushmanskloof-wildernisgebiedreservaat is.
Amber is een van dié wat vroeër ’n satellietsender gekry het, het mnr. Jaco Fourie, hoofveldwagter, van die reservaat, by navraag aangedui.
Besoek www.capeleopard.org vir meer inl
- Die Burger