Ongebore kalf, koeie, gekry ná vlaag diefstal
2010-07-28 09:18
Beeld
Die ongebore kalfie van ’n gesteelde koei in die Fochville-omgewing is vandeesweek nog in sy baarmoedersak naby Ennerdale, suid van Johannesburg, gevind.
Sy ma, wat steeds skoonveld is, is een van tien koeie wat verlede week van Sonnyboy Shabalala gesteel is.
Hy is een van talle boere in die Fochville-omgewing wat veral die laaste paar maande onder ’n vlaag van veediefstalle deurloop.
Volgens Shabalala, wat soos ander boere in die omgewing al derduisende rande se skade gely het, is twee van sy koeie en een kalf Sondag teruggevind.
Nog een is Vrydag gekry.
Die ander ses beeste wat verlede Donderdag van sy grond op Rietfontein naby Fochville gesteel is, is steeds skoonveld.
Mark Gietzmann, nog ’n boer in die Fochville-omgewing, het Shabalala Sondag gehelp om na sy gesteelde koeie te soek.
“Onder andere ’n jong beeswagtertjie en iemand wat gras in die omgewing gesny het, het ons gewys waar om te soek,” het Gietzmann vertel.
“Die volgende oomblik het ’n swart kalfie voor ons opgespring – ongedeerd.”
Gietzmann het gesê die kalfie se pote is by ’n vorige diefstal stukkend gekap, maar sy beserings was nie so ernstig dat hy van kant gemaak moes word nie.
Die veediewe jaag beeste tot naby hul huise, kap hul pote stukkend om te verhinder dat hulle wegloop en slag hulle later.
Nog twee van Shabalala se gesteelde beeste is ook Dinsdag in ’n erf in Finetown, ’n township naby Lenasia, suid van Johannesburg, gevind.
“’n Man in die omgewing het ons daarvan gesê, maar was eers bang om ons na die erf te neem,” het Gietzmann vertel.
“Ons kon hom egter ompraat.”
Die beeste is ongedeerd daar gevind.
Kol. Johan Scott, bevelvoerder van die Gautengse diefstaleenheid, het bevestig die twee beeste is Sondag op die perseel gevind.
Volgens hom het die eienaar van die perseel waar die beeste gevind is, gesê een van sy werkers het twee vreemde beeste in die veld naby die township sien wei.
“Hy het die beeste na sy erf gebring en is na die Ennerdale-polisiekantoor om te vra dat iemand wat navraag oor die beeste doen hom kontak.
“Ons het die inskrywing daaroor wel by die polisiekantoor gevind.”
Scott het weer gevra dat boere hul eiendom behoorlik beveilig en nie ongedokumenteerde werkers in diens neem nie.
- Beeld