Ondersese kabel op pad na SA
2010-02-12 15:15
Johannesburg - Die Oos-Afrikaanse ondersese telekommunikasiekabel (EASSy) sal na verwagting Saterdag by Mtunzini, aan die noordkus van KwaZulu-Natal aanland.
Telkom het Vrydag in ‘n verklaring gesê hulle is ’n vennoot van EASSy in Suid-Afrika.
Suid-Afrika is ook die gasheerland van een van die nege ondersese telekommunikasiekabels wat verskeie dele van die Sub-Sahara met die res van die wêreld sal verbind.
Die ander vennote is Soedan, Djiboeti, Somalië, Kenia, Tanzanië, Comoros, Madagaskar en Mosambiek.
Alphonzo Samuels, Telkom se besturende direkteur van groothandelaars het gesê EASSy was een van die elemente in Telkom se beleggingstrategie in telekommunikasiekabels.
EASSy is ’n 10 000km ondersese telekommunikasiekabelstelsel wat tans aan die ooskus van Afrika gebou word.
Onderlinge verbinding met verskeie ander ondersese internasionale kabelstelsels sal verkeer op EASSy in staat stel om met Europa, Noord- en Suid-Amerika, die Midde-Ooste en Asië te verbind en so Afrika se verbintenis met die globale telekommunikasie netwerk ophef.
Samuels het gesê EASSy sal na verwagting teen Augustus vir kommersiële dienste gereed wees.
Hy het bygevoeg dat ondersese kabels baie voordele in hou soos uitstekende kwaliteit van transmissie, hoë transmissiekapasiteit, baie minder vertragings as satelliet, laer eenheidskostes, geen elektromagnetiese steuring nie en dit bied hoë weerstand teen slegte weerstoestande.
"Aktiwiteite soos visvang , aardbewings en ankergooi kan moontlik vertragings meebring,” het hy gesê.
Verskeie stappe is egter geneem om die kabels se beskerming te verseker.
"Sommige kabels is onder die sand gelê waar moontlik, veral in vlakker dele; alle besige roetes waardeur swaer skepe deurbeweeg is uitgeskakel; veilige strande is gekies; strande wat later weens erosie kan verweer, is uitgeskakel; die kabels is met 'n lewenswaarde van ouer as 25 jaar ontwerp, ens."
-Sapa