Omstrede bewering oor 'boustene van lewe' toe verkeerd

2012-07-09 18:38

Washington – Twee nuwe wetenskaplike artikels het 'n omstrede bewering deur wetenskaplikes wat sê hulle het 'n lewensvorm gevind wat in arseen kan voortbestaan, verkeerd bewys.

Felisa Wolfe-Simon, voormalige lid van Nasa se astrobiologie-program, het in 2010 ‘n verslag gepubliseer waarin sy beweer ‘n nuwe vorm van lewe is in ‘n meer in Kalifornië ontdek.

Die bakterie, GFAJ-1, wat in die arseen-ryke Mono-meer gevind is, was veronderstel om die boustene van die lewe te herdefinieer. Die bakterie kan na bewering oorleef deur fosfor vir arseen te verruil in sy sel- en DNS-membrane.

Arseen word oor die algemeen beskou as giftig vir lewende organismes.

Twee afsonderlike artikels wat in die Science-tydskrif gepubliseer is, beweer nou dat Wolfe-Simon se groei-medium “met genoeg fosfaat besmet is om GFAJ-1 se groei te ondersteun”.

Die oorspronklike bewering moes bevestig word voordat dit as ‘n ware ontdekking beskou kon word en dié twee afsonderlike spanne het gevind dat die bakterie inderdaad nie sonder die fosfor kon voortbestaan nie.

– Volg Nuus24 op Twitter.