Omgewingsaktiviste waarsku oor 'kernramp' in SA
2012-03-05 11:33
Kaapstad – Greenpeace-aktiviste het die Seepunt-strand in Kaapstad "skoongemaak" om bewustheid te bevorder oor die gevolge wat 'n moontlike kernramp kan inhou.
"Ons probeer bewustheid skep oor die gevare van kernkrag. Dis amper een jaar sedert Fukushima gebeur het en ons sê wanneer jy ookal naby 'n kernkragstasie woon, is daar potensiaal vir sulke gevaar," het Ferial Adam, altivis vir Greenpeace Afrika, gesê.
Die veldtog fokus op die gevare van radio-aktiewe afval in 'n kernkrisis, soortgelyk aan die ramp wat Japan getref het ná probleme by die Fukushima Daiichi-kernaanleg wat gevolg het op die aardbewing en tsoenami op 11 Maart 2011.
Verskeie lande het hul kernkragplanne geskrap sedert dié ramp wêreldwyd opslae gemaak het.
Greenpeace wil die Suid-Afrikaanse regering oortuig om 'n einde aan sy kernkragaktiwiteite te bring, en om eerder meer te belê in hernubare energiebronne.
"Kernkrag is definitief 'n 'vuil' bron van energie; dis duur en dis te min, te laat," het Adam gesê.
Suid-Afrika se steenkoolvorraad word beraam op sowat 30 400 miljoen ton, of sowat 3% van die wêreld se voorraad. Greenpeace meen die regering moet nou fokus op hernubare energie, terwyl steenkool nog volop is.
"Pleks daarvan dat ons geld mors en dit in kernkrag sit, sê ons nou is eerder die tyd om dit in hernubare energie te belê," het Adam gesê.
– Volg Nuus24 op Twitter.
- Nuus24
