Om te Facebook by die werk of nie?
2010-02-26 16:01
New York – ‘n Algemene probleem onder die gebruikers van Facebook en ander sosiale netwerke, is wat om te doen as jou baas, of werknemer deel van jou netwerk wil wees.
‘n Onlangse peiling het gevind dat 56% van Amerikaners sê dit is onverantwoordelik om met jou baas vriende op dié sosiale netwerk te wees terwyl 62% sê dit is verkeerd om deel van jou werkers se sosiale netwerke te wees.
Sowat 76% glo tog dat dit aanvaarbaar is om met kollegas op sosiale netwerke vriende te wees.
Dié peiling is Donderdag bekendgemaak en is onder 1000 mense gedoen.
“As die rolle in die werkplek verander, wat moet mens doen? Verwyder jy iemand van jou sosiale netwerk as hulle bevorder word en skielik die baas is?” vra Kelly Holland, een van die navorsers wat aan dié studie gewerk het.
Die peiling het getoon dat 73% van mense voel dit is nie van pas om jou Facebook-status by die werk te handhaaf nie terwyl 82% gesê het dit is ook onaanvaarbaar om foto’s op te plaas as jy by die werk is. Sowat 72% voel mens moet nie boodskappe oor Twitter van die werk af stuur nie en 79% sê dit is verkeerd om aanlynvideos by die werk te kyk.
Tog het 66% gesê dit is aanvaarbaar om jou persoonlike e-posse by die werk te lees.
Amerikaners is glo ook verdeeld as dit kom by die vraag of maatskappy potensiële werkers se sosiale netwerke mot deurgaan voor hulle aanstellings maak. Sowat 52% voel dit is nodig terwyl 48% sê dit is onaanvaarbaar.
- News24