Ollies wild in Gauteng
2011-10-31 07:00
Johannesburg – En nou’s daar ook wilde olifante in Gauteng.
’n Familietrop is verlede week in die Dinokeng-wildreservaat, skaars ’n klipgooi van Pretoria af, vrygelaat.
Die Makalali-wildreservaat naby Hoedspruit, Limpopo, het die familiegroep van tien olifante aan dié reservaat geskenk.
Die groep bestaan uit ’n 20-jarige matriarg, wat met ’n satelliet-opsporingshalsband toegerus is, ses koeie, waarvan die jongste twee jaar oud is, en drie bulle, tussen vier en 16 jaar oud.
Hulle is Dinsdagoggend in hul nuwe tuiste vrygelaat.
“Die verskuiwing van die olifante van Hoedspruit na Dinokeng was ’n groot uitdaging, maar ons is baie bly dat hulle veilig hiér aangekom het,” het mnr. Etienne Toerien, voorsitter van die Dinokeng-wildreservaatbestuursvereniging, gesê.
Die olifantkoeie is ook deel van ’n langtermyn immuno-voorbehoedingsprogram, wat daarop gemik is om olifantgetalle konstant te hou.
Die program word al 11 jaar lank suksesvol in die Makalali-wildreservaat toegepas.
Die familiegroep is die eerstes wat in dié program betrokke is en wat na ’n ander reservaat verskuif is.
Die olifante en ’n trop van vier leeus, twee mannetjies en twee wyfies, wat verlede week hier vrygelaat is, loop nou vir die eerste keer in meer as ’n eeu vry in Gauteng.
Toerien het gesê die laaste lede van die Vyf Grotes, buffels, sal binne ses maande ook in die reservaat gevestig word.
– Volg Nuus24 op Twitter
- Beeld