Olifant in rolprent mishandel, beweer groep
2011-05-12 07:09
Johannesburg - Dierebeskermingsverenigings wêreldwyd doen ’n beroep op alle fliekvlooie om Water for Elephants te boikot nadat steelvideo’s van beweerde mishandeling van die olifantster in die rolprent aan die lig gekom het.
Die rolprent handel oor Rosie die Asiese olifant wat wreed deur ’n sirkusbaas mishandel word. Reese Witherspoone en Robert Pattinson vertolk die hoofrolle.
Die Amerikaanse maatskappy Have Trunk Will Travel Inc. het die 42-jarige olifant Tai, Rosie in die rolprent, opgelei.
Vervaardigers van die rolprente George of the Jungle (1997) en Evan Allmighty (2007) het ook van dié maatskappy se olifante gebruik.
Die Britse dierebeskermingsvereniging Animal Defenders International het verlede week steelvideo’s wat in 2005 gemaak is op sy webwerf gelaai wat wys hoe olifante tydens opleiding mishandel word.
Luidens ’n verklaring deur die Suid-Afrikaanse Dierebeskermingsverenigings (DBV) word olifante in die steelvideo erg mishandel en geslaan.
Olifante word glo geslaan tot hulle toertjies doen, skokstokke word onnodig gebruik en ’n olifant se tande word na aan die been afgesaag.
Luidens ’n verklaring van Gary en Kari Johnson, stigters van Have Trunk Will Travel Inc., is alle beweringe en sogenaamde video’s van mishandeling onwaar en kwaadwillig.
“Ekstremiste-groepe gebruik Tai se rol in Water for Elephants as ’n voertuig om olifante en ander eksotiese diere uit die vermaakbedryf te verwyder,” het die Johnsons gesê.
“Die groepe het ’n agenda en ’n geskiedenis van oneerlike wyses om hul doelwitte te bereik. Wees verseker ons sal voortgaan om ons olifante met liefde te versorg soos hulle verdien.”
’n Polisie-ondersoek is begin nadat die video aan die lig gekom het.
Volg Nuus24 op Twitter
- Die Burger