Olie bedreig seelewe aan Kaapse kus

2012-09-02 22:31

Johannesburg – Kaapse owerhede het Sondag begin met pogings om verskeie pikkewyne naby Robbeneiland wat met olie bedek is, te red, het die Stad Kaapstad gesê.

Wilfred Solomons-Johannes, woordvoerder vir die stad se rampbestuursentrum, het gesê amptenare het minstens vyf pikkewyne gesien wat met olie bedek is, en het met reddingspogings begin.

"Een van die pikkewyne is gevang en sal na die Suider-Afrikaanse stigting vir die beskerming van seevoëls (Sanccob) in Table View geneem word," het Solomons-Johannes gesê.

Pogings om die ander vier te red duur voort, en dis nog nie duidelik hoeveel ander pikkewyne deur die oliebesoedeling geraak is nie.

"Dis nie duidelik hoe ernstig die voëls deur die olie geraak word nie, maar veeartse sal hulle ondersoek en bepaal waar hulle vrygelaat moet word."

Die olie is waarskynlik afkomstig van die Seli 1, 'n vistreiler wat naby Table View gestrand lê. Die treiler het Vrydagaand in stormweer in drie stukke opgebreek.

– Volg Nuus24 op Twitter.

- SAPA