Oekraïnse weermag lei dolfyne op

2012-10-12 11:02

Kiev – Oekraïne is besig met ‘n spesiale projek waar hulle seediere oplei om aan vlootsendings deel te neem, het ‘n nuusverslag gelui.

“Op die oomblik word 10 dolfyne opgelei om spesiale opdragte uit te voer in die Oekraïnse staatsoseanarium,” het ‘n sekuriteitsbeampte aan RIA-Novosti gesê.

“Die Oekraïense weermag leer seediere gereeld hoe om na voorwerpe op die bodem van die see te soek,” het die beampte gesê en bygevoeg dat dolfyne ook geleer word om bote aan te val met messe en pistole wat aan hul koppe vasgemaak is, het The Moscow Times berig.

Die Sowjet-vloot het dolfyne vir soortgelyke doeleindes in 1973 gebruik, maar na die val van die Sowjet-Unie het die Oekraïne die program oorgeneem.

Die beampte het Donderdag gesê dat die Oekraïense weermag voortgegaan het met die program, maar dat hulle dit nooit openbaar gemaak het nie.

Die enigste ander plek waar dolfyne geleer word om iets aan te val, is in San Diego, Kalifornië.

– Volg Nuus24 op Twitter