Oefen hou nié vetrolletjies weg tydens swangerskap
2011-10-20 12:52
New York – ‘n Streng oefenprogram tydens swangerskap help dalk nie om die vetrolletjies af te hou nie, het ‘n studie bevind.
Die bevindinge is “nie verrassend nie,” het die navorser Patrick Catalano van die Case Western Reserve University School of Medicine in Cleveland, Amerika gesê.
Die navorsers het 82 swaar vroue bestudeer wat tussen drie en vyf maande swanger was.
Hulle het die vroue in twee groepe verdeel. Die een groep het saam met hul gewone berading addisionele berading oor dieet en oefening ontvang terwyl die ander groep slegs gewone berading oor swangerskap gekry het.
Sowat die helfte van die vroue het ongeag van die groep meer as die aanbevole gewig tydens hul swangerskap opgetel.
Catalano het egter gesê die bevindinge verander nie die feit dat oefen gesond is nie.
“Matige oefening is uiters goed vir swanger vroue,” het hy gesê. “Daar is geen twyfel nie.”
Die navorsing is in BJOG: An International Journal of Obstetrics and Gynecology gepubliseer.
– Volg Nuus24 op Twitter.
- Reuters