Obama spog met gewildste tweet ooit

2012-11-07 11:03

Barack Obama (Jewel Samad, AFP)

New York – Pres. Barack Obama het met sy herverkiesing nie net op die politieke front opslae gemaak nie – hy het ook op die sosiale netwerk Twitter 'n rekord gebreek.

Forbes berig Obama het die rekord gebreek vir die gewildste Twitter-boodskap ooit.

Die maatskappy Media Bistro se All Twitter-blog het in laat September 'n tabel opgetrek van die gewildste Twitter-boodskappe tot dusver. Die tabel is opgetrek op grond van die aantal kere wat 'n spesifieke Twitter-boodskap gedeel is.

'n Tweet deur Justin Bieber, wat 223 376 keer gedeel is, was tot Woensdagoggend bo-aan die lys.

Pres. Obama het egter Bieber se rekord gebreek met 'n enkele boodskap wat gepos is ná die media berig het dat hy die staat Ohio sal wen.



Die boodskap, "Nog vier jaar," wat gepos is saam met 'n foto van Obama en sy vrou, Michelle, is teen Woensdag vroegoggend meer as 320 000 keer op Twitter gedeel. 

– Lees hier meer.