Obama Twitter se grootste ster in 2012

2012-12-12 09:17

San Francisco – Pres. Barack Obama se eenvoudige oorwinningsboodskap op Twitter was die gewildste tweet van 2012, het dié maatskappy gesê.

"Four more years (Nog vier jaar)," het Obama kort ná sy verkiesingsoorwinning in November op Twitter geskryf. Dié boodskap is deur 816 973 Twitter-gebruikers in meer as 200 lande gedeel.

Die boodskap het die rekord gebreek vir die meeste “retweets” (wanneer iemand anders se Twitter-boodskap deur 'n gebruiker met sy volgelinge gedeel word).

“Binne ure het daardie boodskap die mees gedeelde boodskap van 2012 geword en toe sommer die mees gedeelde boodskap ooit,” het Twitter in ‘n verklaring gesê.

‘n Afskeidsboodskap van die sanger Justin Bieber is die tweede meeste op die sosiale netwerk gedeel in 2012. Bieber het se medelye betoon met ‘n sesjarige aanhanger wat aan breinkanker dood is. Bieber se boodskap is 224 173 keer gedeel.

Die onderwerpe wat die meeste gesprekke op Twitter gelok het, sluit in die Amerikaanse verkiesing, die Olimpiese Spele in Londen, die superstorm Sandy en die dood van die sangeres Whitney Houston.

– Volg Nuus24 op Twitter
 

- Sapa - AFP