Nuwe veiligheidsrisiko vir Internet Explorer-gebruikers

2012-12-15 13:11

New York – 'n Swak plek in verskeie weergawes van Microsoft se bekende webblaaier Internet Explorer kan kuberkrakers in staat stel om muisbewegings dop te hou, het die tegnologiewebwerf Mashable berig.

Weergawe 6 tot 10 van Internet Explorer word geraak deur die probleem, wat deur kuberkrakers uitgebuit kan word om sensitiewe inligting te bekom.

Kuberkrakers versamel inligting oor gebruikers se beweging op webwerwe met virtuele toetsborde, wat gewoonlik gebruik word om wagwoorde en rekeningbesonderhede in te tik. Op dié manier kan kuberkrakers wagwoorde en ander inligting bekom.

Internetmisdadigers hoef bloot 'n advertensie op 'n spesifieke webblad te plaas, wat hulle dan toegang gee tot die beweging van almal wat daardie blad gebruik.
 
Die probleem is ontdek deur Spider.io, 'n webstatistieke-maatskappy, as deel van 'n reeks toetse om die doeltreffendheid van advertensieplasings te meet.

Microsoft is glo in Oktober al van die probleem in kennis gestel, maar het nog geen planne aangekondig om dit reg te stel nie.

– Lees hier meer.

– Volg Nuus24 op Twitter.