Nuwe teleskoop los dalk ruimte-raaisels op
2012-12-31 11:48
Sydney – Wetenskaplikes hoop 'n nuutgeboude reuse-radioteleskoopstelsel in Wes-Australië sal hulle help om 700 000 nuwe sterrestelsels in 2013 te ontdek.
Die Australiese SKA-padvinder (Askap), wat £65 miljoen (sowat R890 miljoen) gekos het, is vroeër vanjaar geopen en bestaan uit 36 identiese sateliete wat saamwerk as een installasie.
Askap kan sterrekundiges ook help om die raaisel van "donker energie" op te los. Dié energie is glo daarvoor verantwoordelik dat sterrestelsels teen ‘n versnellende koers uitmekaarspat.
Askap is deel van ‘n groter projek, naamlik die SKA-projek, wat deur Suid-Afrika en Australië gedeel word.
Die sentrale deel van die SKA-teleskoop sal in die Karoo gebou word, terwyl afgeleë stasies ook in Botswana, Madagaskar, Namibië, Ghana, Mosambiek, Zambië, Kenia en Mauritius opgerig sal word.
Die ander deel van die SKA word in Nieu-Seeland gebou.
Behalwe vir die gasheerlande, Suid-Afrika en Australië, tel Brittanje, Kanada, China, Indië, Nederland en Swede ook onder die lede van die SKA-projek. Duitsland, Japan en Suid-Korea stel glo ook belang om by die projek betrokke te wees.
Lees hier meer.
– Volg Nuus24 op Twitter
