Nuwe skandeerder help jou aanlyn klere koop

2012-11-21 14:28

Londen – Britse navorsers het met ‘n nuwe skandeerder vorendag gekom wat akkurate metings van 'n mens se liggaam kan neem om te gebruik wanneer klere aanlyn gekoop word.

Verbruikers is in baie dele van die wêreld nog skrikkerig om klere op die internet te koop, omdat dit moeilik is om vas te stel of dit sal pas of nie. Dis om dié rede dat aanlyn-verkope van klere nog nie so hoog is soos byvoorbeeld dié van musiek of boeke nie.

Die maatskappy ComScore het byvoorbeeld gevind dat net 14% van alle internet-aankope in die VSA in die eerste ses maande van die jaar, klere was.

Dié nuwe skandeerder word vervaardig en ontwerp deur die London College of Fashion, navorsers by die Universiteit van Surrey en die maatskappy Bodymetrics.

Philip Delamore van die London College of Fashion beraam dat sowat 30% tot 60% van alle klere wat op die internet gekoop word, teruggestuur word.

“Dit is algemeen vir internet-kopers om drie of vier verskillende groottes van ‘n item te bestel omdat hulle onseker is of die klere sal pas,” het Delamore gesê.

Met die nuwe stelsel voer die koper sy of haar gewig as verwysing in, en neem dan ‘n vollengte foto van hom- of haarself. Die program gebruik dan dié inligting om ‘n 3D-beeld te skep wat gebruik kan word vir virtuele aanpassessies.

– Volg Nuus24 op Twitter
 

- Reuters