Nuwe program vir biosekuriteit
2011-02-24 11:03
Milaan – Die bedreiging is groot: uitheemse insekte wat in ’n gebied bekendgestel word wat geen natuurlike verdediging daarteen het nie, met die doel om die ekonomie, voedselvoorsiening of beide te destabiliseer.
’n Nuwe $8.2-miljoen (R58.6-miljoen) projek wat deur die Europese Kommissie befonds word sal navors help om biologiese bedreigings vir die wêreld se gewasse en woude beide te verhoed en te reageer wanneer dit wel gebeur.
Die vyf jaar lange projek sal kundiges van agt lande byeenbring, insluitende Italië, die VSA, Israel en Turkye. Dit het op 1 Februarie met bedrywighede begin, maar word eers Donderdag in Turyn amptelik bekend gestel.
Nazi-Duitsland het gedurende die Tweede Wêreldoorlog die ontplooiing van die Colorado Aartappelkewer in Brittanje nagevors met die doel om aartappeloeste uit te wis, en dit is nie ver daarvan verwyderd as terroriste in 'n multi-polêre wêreld soortgelyke dade oorweeg nie, het organiseerders gesê.
Maar die bestaan van die Plant en Voedsel Biosekuriteit-projek, wat by die Universiteit van Turyn baseer is, is nie bedoel om paniek te veroorsaak nie. Baie van wat bestudeer word kan ook gebruik word om die natuurlike, maar ook potensieel destabiliserende, migrasie van insekte en plae te verhoed en identifiseer, het direkteur Maria Lodovica Gullino gesê.
“In gewone kommersialisering reis parasiete met hoë snelhede vanaf een land na die ander. Oorweeg die probleme as ’n krimineel of terroris daaraan dink om ’n saad as ’n manier van biologiese oorlogvoering te gebruik,” het Gullino gesê.
“As mens aan al die voedsel-onluste en die opstande in die Midde-Ooste dink, is ’n gedeelte van die oorsaak hoë voedselpryse, en plantsiektes vorm deel daarvan,” het Jacqueline Fletcher, direkteur vir die nasionale instituut vir voedsel en landbou-biosekuriteit aan die Staatsuniversiteit van Oklahoma, wat aan die projek deelneem, gesê.
"As rys in Suidoos-Asië uitgewis word, is dit iets wat die politieke raamwerk sal ontwrig," het Fletcher gesê.
Volg Nuus24 op Twitter.
- AP