Nuwe plan aangekondig om see te beskerm
2012-08-12 08:50
Yeosu, Suid-Korea – Die hoof van die Verenigde Nasies (VN) het Sondag 'n inisiatief aangekondig om die wêreld se oseane te beskerm teen besoedeling en die oorbenutting van visbronne.
Ban Ki-moon, sekretaris-generaal van die VN, het gesê die inisiatief, genaamd Oceans Compact, stel 'n strategiese visie vir die VN om meer effektief te werk om die "kommerwekkende toestand" van die wêreld se oseane te verbeter.
Ban het die "ernstige bedreiging" weens besoedeling, die oorbenutting van visbronne en aardverwarming beklemtoon.
"Ons oseane word warmer en groter," het hy in 'n toespraak gesê.
"Ons loop die risiko van onomkeerbare veranderings in prosesse wat ons amper nie kan verstaan nie, soos die groot seestrome wat weerspatrone beïnvloed.
"Die versuring van die see vreet die basis van ons seelewe weg; en die styging in seevlakke dreig om die wêreldkaart oor te teken ten koste van honderde miljoene van die wêreld se mees weerlose mense."
Ban het gesê die Compact-plan mik om "die gesondheid van die oseane te verbeter".
Hy het gesê die plan se doel is om die bestuur van die wêreld se oseane te verbeter deur 'n aksieplan wat gestuur sal word deur 'n hoëvlak-raad wat bestaan uit senior amptenare, wetenskaplikes en verteenwoordigers van belangegroepe.
– Volg Nuus24 op Twitter.
- Sapa - AFP
