Nuwe iPhone5 kort 'wow-faktor'
2012-09-13 10:18
San Francisco – Apple se nuwe iPhone, met sy groter skerm en 4G-tegnologie, sal van Vrydag verkoop word, met die maatskappy wat probeer om op die voorvoet te bly teen mededingers soos Samsung Electronics en Google.
Die iPhone 5 het die meeste verwagtinge van tegnologie-ontleders vervul en die bekendstelling het min verrassings ingehou.
“Daar is nie ‘n wow-faktor nie, want alles wat julle vandag gesien het, is evolusionêr. Ek dink wel hulle het genoeg gedoen om tevrede te stel,” het Michael Yoshikami, uitvoerende hoof van die maatskappy Destination Wealth Management, gesê.
Ander ontleders in die bedryf het bespiegel oor wat nog in Apple se produksie-pyplyn is voor die vakansieseisoen, veral omdat die maatskappy stil was oor gerugte van ‘n televisie-toestel en sprake van ‘n kleiner iPad.
Die skepper van die gewilde iPad het geen aanduiding gegee of hy ‘n kleiner weergawe daarvan beplan om te kompeteer met goedkoper tabletrekenaars soos dié van Google of Amazon.com nie.
Die jongste iPhone kom te midde van sterk kompetisie tussen Apple en sy huidige mededingers Samsung en Google.
Ontleders voorspel dat 10 miljoen tot 12 miljoen van die nuwe iPhones vandeesmaand verkoop sal word.
– Kyk hier na ‘n video van die iPhone 5
– Volg Nuus24 op Twitter
- Reuters
