Nuwe Google-diens beskerm jou Android-foon
2012-02-06 11:00
Kaapstad – Google het 'n nuwe diens aangekondig wat sal help om jou Android-slimfoon teen virusse en ander potensieel skadelike sagteware te beskerm.
Dié nuwe diens, bekend as Bouncer, soek outomaties deur Android-slimfone na skadelike sagteware. Hiroshi Lockheimer, een van Android se sagteware-hoofde, het dié nuus op die Google-blog bekend gemaak.
"Hier is hoe dit werk: Wanneer 'n toepassing opgelaai word, begin die diens dit dadelik analiseer vir bekende skadelike sagteware, spioenware en trojaanse perde. Dit kyk ook na gedrag wat toon dat die toepassing dalk ongewoon optree, en vergelyk dit met toepassings wat vroeër geanaliseer is om moontlike gevaartekens te bespeur," het Lockheimer in sy inskrywing gesê.
Die rekenaarsekerheidsmaatskappy McAfee het in November gewaarsku dat gebruikers van Google se Android-bedryftselsel 'n al groter risiko loop om met virusse en ander skadelike sagteware te doene te kry.
McAfee het gesê sy statistiek toon 'n toename van 37% in skadelike sagteware wat dié bedryfstelsel teiken.
Die meeste slimfone in die VSA gebruik 'n vorm van die Android-bedryfstelsel.
Lockheimer het bevestig Google neem dié probleem ernstig op.
"Die diens soek al vir 'n geruime tyd na skadelike toepassings in Market, en ons het tussen die eerste en tweede helfte van 2011 'n afname van 40% in die aflaai van potensieel skadelike toepassings op Android Market gesien."
– Lees hier meer.