Nuwe Facebook-uitleg gou beskikbaar
2011-12-07 10:08
New York – Facebook het begin om sy nuwe bladuitleg geleidelik aan gebruikers beskikbaar te stel na die sosiale netwerk privaatheidkwessies uitgepluis het.
Facebook het in September reeds sy nuwe Timeline-funksie bekendgemaak en het ontwikkelaars en ongeduldige gebruikers stil-stil maniere gegee om die nuwe bladuitleg vroegtydig te bekom.
Nieu-Seeland is nou die eerste om Timeline te kry en Facebook het in sy blog bekendgemaak ander gebiede sal "binnekort" die nuwe uitleg kan sien.
Die nuwe uitleg kom minder vertikaal voor en illustreer die gebruiker se lewe grafies op die blad.
Timeline vertel ook nie net sy gebruikers se lewensverhaal sedert ‘n vriend hulle oortuig het om by Facebook aan te sluit nie – dit vertel jou hele storie vanaf jou geboorte.
Privaatheidskwessies het egter die bekendstelling van Timeline vertraag aangesien gebruikers op die grafika kon sien wanneer hulle hul vriendelyste bygekom het en vriende afgevee het.
Dié probleem is nou uitgestryk, meen Facebook.
Kyk hier na 'n video van Facebook se nuwe uitleg.
– Lees meer en kyk hier na foto’s van Facebook se nuwe uitleg.
– Volg Nuus24 op Twitter.