Nuwe BlackBerry binnekort in SA

2013-01-28 13:39

Kaapstad – Nuwe BlackBerry 10-toestelle sal glo nie té lank na die wêreldwye bekendstelling in Suid-Afrika beskibaar wees nie, het bronne aan MyBroadband gesê.

BlackBerry 10-toestelle sal glo in die middel van Februarie by selfoonoperateurs afgelewer word, en die fone behoort teen die einde van Februarie by handelaars beskikbaar te wees.

Research in Motion, die maatskappy wat die Blackberry-handelsmerk besit, sal die nuwe Blackberry 10-bedryfstelsel op Woensdag, 30 Januarie bekendstel.

Daar is min inligting bekend oor die nuwe reeks BlackBerry 10-slimfone, maar enkele foto’s het al in die media verskyn. Een van die toestelle het volgens berigte ‘n toetsbord, terwyl 'n ander model slegs 'n raakskerm het.

MTN en Vodacom het gesê meer inligting sal eers nader aan die bekendstelling gegee word. Cell C het intussen aangekondig dat hy vroeg in 2013 BlackBerry 10-toestelle beskikbaar sal hê.

– Volg Nuus24 op Twitter