Nóg teenstand teen hidrobreking

2012-12-12 14:13

Kaapstad – AfriForum het Dinsdag in ‘n verklaring gesê hy het ‘n alliansie met die Treasure the Karoo Action Group (TKAG) gevorm om hidrobreking vir skaliegas in die Karoo teen te staan.

“Dit is opwindend om met ’n organisasie ’n vennootskap aan te gaan wat ons waardes van integriteit en volhoubaarheid deel om die nageslag die kans te gun om ons natuurlike erfenis te geniet,” het Julius Kleynhans, AfriForum se hoof van omgewingsake, gesê.

“AfriForum en die TKAG sal aanhou om hidrobreking teen te staan totdat wetenskaplike en ekonomiese bewyse getoon kan word wat aandui dat dit ’n verstandige, veilige en volhoubare keuse vir Suid-Afrika is.”

“In Suid-Afrika word goeie praktyk slegs op papier gevind. Daar is verskeie skuiwergate in ons huidige wetgewing oor omgewingsbestuur en voor dié nie toegestop word nie, hou dié projek ’n enorme risiko in. Ons is van die opinie dat die wetgewing ordentlik toegepas moet word voor hidrobreking eens oorweeg word,” het Kleynhans bygevoeg.

Die gebied in die Karoo waar baie van dié skaliegas voorkom word tans deur die energiemaatskappy Royal Dutch Shell en die petrochemiese groep Sasol ondersoek.

Die kabinet het in September ‘n moratorium op hidrobreking in die Karoo opgehef.

– Volg Nuus24 op Twitter