Seksposisie-epos is gevaarlike rekenaarvirus
2011-01-18 09:33
San Francisco – Die Sophos rekenaar-sekuriteitsfirma het Vrydag gewaarsku dat kuberkrakers besig is om ‘n gevaarlike rekenaarvirus te versprei.
Die virus kom in ‘n aanlyn-lêer met die belofte van ‘n PowerPoint-vertoning waarin seksuele posisies van die Kama Sutra vertoon word.
“Wees versigtig wat jy met daardie muis doen,” het Graham Cluley van Sophos in ‘n aanlyn-verklaring, Dinsdag deur AFP uitgereik, gesê.
“Wanneer jy op die lêer klik sien jy wel die PowerPoint-vertoning, maar agter die skerms word ‘n Trojan-virus, genaamd Troj/Bckdr-RFM, op jou rekenaar geïnstalleer.
“Hierdie virus gee kuberkrakers toegang tot jou rekenaar.”
Sodra ‘n rekenaar die virus opgetel het, kan kuberkrakers persoonlike inligting steel en die gebruiker se persoonlike aktiwiteite afloer. Hulle kan die rekenaar ook gebruik om gemorspos te stuur of om webwerwe aan te val.
‘n Effense vertroosting, indien die virus ‘n persoon se rekenaar getref het, is dat hy darem ‘n paar interessante seksposisies in die PowerPoint-vertoning sou gesien het, het Cluley gesê.
Volg Nuus24 op Twitter
- AFP