'Navorsingshaai' gevang, deur inwoners geëet

2012-10-31 18:09

Johannesburg – 'n Haai wat in Maart deur die eksperimentele navorsingsvaartuig Ocearch in Maart by Mosselbaai met 'n sender toegerus is, is aan die kus van Mosambiek gevang, doodgemaak en geëet, het RSG Woensdag berig.

Die navorsingspan sê op sy webwerf dat die wyfiehaai van 3,6 meter met die naam Brenda Fassie, deur plaaslike vissermanne in 'n net gevang is.

Die vleis is aan inwoners van 'n nedersetting gegee en die vinne is verkoop.

'n Mosambiekse nie-regeringsorganisasie, 'n duik-onderneming en 'n vrywilliger het deur afgesonderde gebiede gereis om te probeer vasstel wat van die haai geword het.

Die sender is gekry en daar is vasgestel dat die haai van Mosselbaai af, deur die Mosambiek-kanaal geswem en op 20 September naby Maputo aangekom het.

'n Sein is op 4 Oktober van 'n nedersetting in Mosambiek gekry wat die span na die opspoorplek gelei het.

Volg Nuus24 op Twitter.

– RSG

- Sapa - AFP