Mens se ingewande 'verander drasties'
2013-01-14 10:47
San Francisco – Navorsing deur Amerikaanse wetenskaplikes oor die samestelling van gedroogde menslike ontlasting wys dat die moderne lewe gelei het tot dramatiese veranderinge in die samestelling van die inhoud van die mens se ingewande.
Raul Tito en sy kollegas by die Universiteit van Oklahoma het die samestelling van menslike ontlasting op mikrobiese vlakk by drie argeologiese terreine op die Amerikaanse vasteland ontleed.
Dié terreine is gekies omdat hulle ‘n groot verskeidenheid omgewingstoestande verteenwoordig.
Die uitslae, wat deur middel van DNS-toetse verkry is, het glo merkwaardige veranderinge getoon.
“Die uitslae wys dat die inhoud van menslike ingewande weens die moderne lewenstyl drasties verander het,” het Cecil Lewis, een van die wetenskaplikes wat aan die projek gewerk het, gesê.
Die toetse het getoon dat die bakteriese samestelling van die ontlasting soortgelyke eienskappe het as dié van kinders wat tans in landelike gebiede in Afrika woon.
Dit het egter geen ooreenkomste getoon met die komposisie van ‘n tipiese Amerikaanse volwassene se ontlasting nie.
Die navorsers glo ook dat die moderne gebruik van antibiotika die gesondheid van ons spysverteringskanaal negatief beïnvloed het, wat die vatbaarheid vir auto-immuunsiektes en ander siektes laat toeneem.
– Volg Nuus24 op Twitter
- Sapa-DPA
