Navorsing bewys dat rooibos goed is
2010-07-27 09:55
Die Burger
Kaapstad - Die eerste kliniese bewyse dat rooibostee wel anti-oksidante in ’n mens se bloed verhoog, is pas gevind.
As ’n mens dus dié tee drink, verhoog dit jou natuurlike verdedigingsmeganismes, het die vier internasionale navorsingsinstellings wat aan die studie gewerk het, gesê.
Baie mense wat sogenaamde natuurlike produkte bemark, maak aanspraak op doeltreffendheid, maar dié studie, pas gepubliseer in die vakjoernaal Food Chemistry, het die kliniese bewyse om dit te staaf.
Dit toon ook dat tradisionele rooibostee (gefermenteer) sowel as groen rooibostee (ongefermenteer) die hoeveelheid anti-oksidante in die bloed verhoog.
Prof. Mauro Serafini, navorsingsleier aan die anti-oksidantnavorsingslaboratorium in Rome, Italië, het in ’n verklaring gesê dit is moontlik dat sodra die tee in die bloedstroom geabsorbeer is, die unieke bestanddele van rooibos ook ander biologiese uitwerkings in die menslike liggaam kan hê. Daarom gaan navorsing hieroor voort.
Prof. Jeanine Marnewich van die Kaapse Skiereiland Universiteit van Tegnologie het gesê: “Ná ’n uur begin die vlakke van plasma-anti-oksidant daal, en daarom beveel ons aan dat mense ses koppies per dag drink vir goeie gesondheid”.
Sy het onlangs ’n studie gelei waarin bevind is ses koppies rooibostee per dag is voordelig vir die hart.
Verskeie studies die laaste paar dekades het bevind die aktiewe bestanddele in rooibos is bio-beskikbaar en word wel gemetaboliseer in die liggaam.
Die mees aktiewe anti-oksidant in rooibos – aspalatin – is uniek aan sy spesie, Aspalathus linearis. Dié fynbosplant kom veral in die Wes-Kaapse Sederberg voor.
Die Suid-Afrikaanse Rooibosraad belê jaarliks sowat R1 miljoen in navorsing om die gesondheidseienskappe van die plant te ondersoek. Daar word onder meer gekyk na hoe rooibos teen kanker en stres kan werk, asook na die skakel tussen rooibos en oefening.
’n Projek oor rooibos en vetsug is vir 2011 goedgekeur.
Besoek www.sarooibos.co.za vir meer inligting.
- Die Burger