Navorsers maan oor energiedrankies
2012-01-16 10:20
Sydney – Navorsers in Australië het Maandag gevra dat gesondheidswaarskuwings op energiedrankies met 'n hoë kafeïeninhoud aangebring moet word.
Dít kom ná 'n toename in die aantal mense wat mediese probleme aanmeld nadat hulle dié drankies gedrink het.
Gesondheidskenners aan die Universiteit van Sydney se mediese skool en die Nieu-Suid-Wallis Inligtingsentrum oor gif, het gesê die getal gevalle van reaksies op drankies soos Red Bull en V het van 12 in 2004 tot 65 in 2010 toegeneem.
Altesaam 297 oproepe vir bystand is oor die sewe jaar tot in 2010 opgeneem en minstens 128 mense is met simptome wat hartkloppings en maagaandoening insluit, opgeneem.
Van dié 128 gevalle, het 20 mense meer ernstige kwessies soos stuiptrekkings gehad.
Volgens die studie wat in die Medical Journal of Australia gepubliseer is, is die gemiddelde mens wat geraak word 17 jaar oud en meng dikwels energiedrankies met alkohol.
– Volg Nuus24 op Twitter