Navorser: SA-kleuters kyk te veel TV
2009-09-11 08:36
Thinus Ferreira
Kaapstad - Suid-Afrika se jong TV-kykers is verslaaf aan Generations –al word dit ver verby hul slaaptyd uitgesaai – loop nie Egoli mis nie en is baie lief vir Thabang Thabong.
Met weinig navorsing en inligting wat beskikbaar is oor die kykgewoontes van baie jong Suid-Afrikaanse TV-kykers, het Kobus van Staden, navorser en ontwikkelingsbestuurder by die SAUK se afdeling vir inhoudsprojekte, kyksyferinligting vir kinders van vier tot ses jaar oud gaan ontleed.
Inligting oor kinders tussen die ouderdom van vier en ses jaar word sedert middel verlede jaar by Suid-Afrika se kyksyfertelling ingewerk en daar word van hul kykpatrone dagboek gehou.
Die verrassendste bevinding is dat kleuters per dag byna die helfte soveel TV as volwassenes kyk. Kleuters kyk gemiddeld 1,5 uur per dag, kinders tussen 7 en 12 jaar 2,3 uur en volwassenes 3,25 uur.
Afrikaans- en Engelssprekende kinders kyk egter baie meer TV as hul Nguni- en Sothosprekende eweknieë. “Waar Nguni- en Sothosprekende kinders gemiddeld 1,32 uur per dag TV kyk, kyk Afrikaans- en Engelssprekende kinders gemiddeld 2,45 uur.”
Volgens hom is TV-kyk in Suid-Afrika steeds ’n kollektiewe ding. “Die kykpatrone van vier- tot sesjariges toon dat ander lede van die huishouding beheer oor die afstandbeheerder het.”
In nog ’n verrassende neiging styg die kyksyfer saans om 20:00 skerp vir hierdie groep wanneer hulle saam met hul ouers Generations kyk – die gewildste sepie en die gewildste TV-program in die land.
Saterdae sit hulle reeds om 08:00 voor die TV en bly kyk – dikwels tot 21:00 – na wat ook al wys. Op Sondae neem die kyksyfers toe vanaf 09:00 en dit begin omstreeks 20:00 daal.
’n Interessante stukkie statistiek is dat die vier- tot sesjariges dikwels die grootste ouderdomsgroep is wat kyksyfers betref. SABC2 trek op weeksdae wanneer Thabang Thabong uitgesaai word en op Saterdae wanneer die ontbytprogram Weekend Live vertoon word meer van hulle as enige ander ouderdomsgroep.
Op SABC3 regeer dié ouderdomsgroep in die kanaal se kinderkykgleuf.
- Die Burger