Nasa wil asteroïdes vinniger opspoor
2013-02-19 15:34
Washington – Die ruimteverkenningsagentskap Nasa werk tans saam met 'n universiteit en private maatskappye in die VSA om 'n stelsel te ontwerp wat dit makliker sal maak om asteroïdes vinniger op te spoor.
Dié nuus volg na 'n meteoor verlede week bo die Chelyabinsk-streek (van die Urals) in Rusland in die atmosfeer ontplof het.
Die ontploffing het 'n skokgolf veroorsaak wat daartoe gelei het dat sowat 1 200 mense beseer is. Meer as ‘n duisend huise is ook beskadig.
"Ons verwag dat ‘n gebeurtenis van hierdie omvang een keer elke 100 jaar sal plaasvind," het Paul Chodas, ‘n Nasa-wetenskaplike, in Kalifornië gesê.
Nasa het beraam dat die meteoor sowat 17 m in deursneë was en 10 ton geweeg het voor dit die aarde se atmosfeer bo Rusland binnegekom het.
Op dieselfde dag het ‘n asteroïed van sowat 45 m in deursnee verby die aarde beweeg. Die asteroïed, beter bekend as 2012 14, was groot genoeg om ‘n hele stad te vernietig indien dit die aarde se atmosfeer sou binnekom.
Nasa en die Universiteit van Hawaii het ‘n projek van $5 miljoen (sowat R44 miljoen) genaamd Atlas van stapel gestuur om hemelliggame soos dié op te spoor.
Navorsers sê dat die Atlas-stelsel elke aand die ruimte sal bestudeer en dat dit liggame wat 45 m in deursneë is sowat ‘n week voordat dit die aarde kan tref, sal kan opspoor.
Die doel is om moontlike bedreigings te vind sodat daar genoeg tyd is om waarskuwings uit te reik en om mense te beskerm, het John Tonry, hoofnavorser vir die Atlas-projek, gesê.
“Ons wil genoeg tyd gee sodat mense ‘n gebied kan ontruim, voorsorgmaatreëls kan tref om ‘n gebou te beskerm en sodat mense teen ‘n tsoenami gewaarsku kan word ingeval ‘n hemelliggaam die see tref,” het Atlas se webtuiste gelui.
– Volg Nuus24 op Twitter
- AFP
