Nasa ontdek dalk water op Mars
2011-08-05 15:52
Londen – Wetenskaplikes van die Amerikaanse ruimteagentskap Nasa het nuwe bewyse ontdek dat souterige water tydens die warmste maande op Mars vloei.
Dié vonds verhoog die kanse dat lewe op die rooi planeet kan voorkom.
Nasa se nuwe foto’s wys meer as 1 000 donker “ranke” op die planeet se oppervlak.
Wetenskaplikes glo dit is water wat teen die rande van kraters afloop aan die sonkant van die planeet waar die water glo moontlik smelt in warmer maande.
Navorsers van die Arizona-universiteit het gesê soutwater is die “beste verduideliking” vir die merke wat tussen ‘n halwe meter en vyf meter breed is en honderde meters teen sommige kraters afloop.
“Die beste verduideliking vir dié verskynsel is die vloei van soutwater,” het Alfred McEwen, een van die navorsers, gesê.
Volgens die navorsing, gepubliseer in die wetenskapjoernaal Science, bevat die waterranke moontlik meer as tien liter water elk.
– Lees meer hier of kyk hier na 'n foto van die verskynsel.
– Volg Nuus24 op Twitter.