Nagmerrie-bekendstelling vir iPhone4
2010-07-30 12:33
Wellington – Honderde Nieu-Seelandse kliënte moes Vrydag met leë hande omdraai nadat die tweede fase van die Apple iPhone4 se wêreldwye bekendstelling in ‘n nagmerrie ontaard het.
Die Amerikaanse maatskappy het meer as drie miljoen van die telefone verkoop sedert dit vir die eerste keer ‘n maand gelede in Amerika bekendgestel is.
Verkope het Vrydag in Australië, Oostenryk, Kanada, Denemarke, Spanje en Switserland gestyg.
Maar in Nieu-Seeland het aanhangers vir ure buite winkels gestaan en hulle was gefrustreerd toe die bekendstelling tot later Vrydagmiddag uitgestel is.
Kliënte het ‘n paar uur later nuwe rye gevorm, maar is meegedeel dat slegs Vodafone-rekeninghouers die nuwe foon kan koop, omdat dit nie volop beskikbaar is nie.
Intussen het kliënte in Australië buite in die reën gewag vir die toestel om verkoop te word.
Die foon het egter reeds probleme vir Apple besorg nadat daar klagtes oor die antenna ontvang is.
- Volg Nuus24 op Twitter.
- AFP