Murdoch nou ook op Twitter doenig
2012-01-02 21:18
London – Die mediabaas Rupert Murdoch het die nuwe jaar begin deur 'n nuwe kommunikasiemiddel op die proef te stel – hy is nou ook op die mikroblogdiens Twitter doenig.
Daisy Dunlop, 'n woordvoerder by News International, het Maandag bevestig dat Murdoch, wat herstel ná een van die moeilikste jare van sy loopbaan, op Twitter te vinde is onder die naam @rupertmurdoch.
Die profiel is oor die Nuwejaarsvakansie geskep. Twitter-gebruikers het die profiel se egtheid aanvanklik in twyfel getrek omdat Murdoch die laaste paar maande probeer het om soveel as moontlik uit die kollig te bly.
Murdoch het skerp kritiek ontlok ná 'n meeluisterskandaal wat sy maatskappy geruk het en uiteindelik gelei het tot die sluiting van sy poniekoerant News of the World.
"My nuwejaarsresolusies is om altyd nederig en nuuskierig te wees," het hy op Twitter geskryf. "En natuurlik om te dieet!"
Murdoch het teen Maandagaand bykans 60 000 volgelinge op Twitter gehad. Lees sy inskrywings hier.
– Volg Nuus24 op Twitter.
- SAPA