Moordenaar deur Facebook opgespoor
2010-07-28 10:16
Manila – Die polisie in die Filippyne het Facebook gebruik om ‘n Filippynse rekenaartegnikus vas te trek wat glo verantwoordelik is vir die grusame moorde van nege mense.
Die verdagte, Mark Dizon (28) is Dinsdag in San Fernando-stad, noord van Minila, vasgetrek.
Dizon is deur getuies op sy Facebook-blad geïdentifiseer. Die polisie het uitgevind dat een van die slagoffers se dogters, ‘n voormalige meisie van Dizon was.
“Hy het ‘n rekening op Facebook en twee getuies het hom positief geïdentifiseer,” het senior supt. Danillo Bsutista gesê.
“Hy het nie op Facebook oor die moorde gespog nie, maar ons het uitgevind dat een van Albert Mitchell se dogters sy eks-meisie is.”
Dizon het sy Facebook-rekening gesluit nadat hy agterkom het dat die polisie moontlik op sy spoor is.
Daar word beweer dat hy die Amerikaners, Albert Mitchell (70), Briton James Porter (51) en die Kanadees, Geoffrey Bennun (60) en hul drie Filippynse eggenote en drie huishulpe in afsonderlike aanvalle vermoor het.
Dizon het glo eers vriende met sy slagoffers geraak om hul vertroue te wen en die indruk te skep dat hy hul rekenaars wou herstel, het Bautista gesê.
Dizon sal van moord aangekla word.
- Volg Nuus24 op Twitter.
- SAPA