Mobiele toestelle ál gewilder vir nuus
2012-12-11 08:47
Video - Apple stel iPad Mini bekend
Apple het 'n kleiner weergawe van sy gewilde tabletrekenaar, die iPad, bekendgestel. Kry hier al die besonderhede oor die iPad Mini.
KYK
Washington – Amerikaners van alle ouderdomme gebruik toenemend mobiele toestelle vir nuus, het die uitslae van 'n nuwe studie getoon.
Dié gebruikers het boonop 'n groter aptyt vir media, en het nie net hul aandag van een medium na 'n ander geskuif nie.
Die studie, wat deur die Pew Research Center in samewerking met The Economist Group gedoen is, het getoon dat sowat 'n derde van Amerikaners met tabletrekenaars of slimfone dit op 'n daaglikse basis gebruik vir nuus.
Medianeigings in die VSA word dikwels in ander wêreldmarkte, insluitend Suid-Afrika, herhaal.
Die studie het getoon dat 33% van tabletrekenaar-eienaars in die ouderdomsgroep van 18-29 hulle toestelle daagliks vir nuus gebruik, met 38% van gebruikers in die ouderdomsgroep 30-49. Altesaam 43% van gebruikers in die ouderdomsgroep 50-64 gebruik dié toestelle daagliks vir nuus, en 32% van diegene oor 65 gebruik dit vir dié doel.
Die syfers lyk amper identies vir slimfoongebruikers.
Volgens die verslag stel jongmense oor die algemeen baie minder belang in nuus, en het nie veel tyd vir die drukmedia nie.
Mans bestee meer tyd aan nuusmedia as vroue: die studie het getoon 43% van manlike tabletrekenaareienaars gebruik hulle toestelle daagliks om op hoogte van nuus te bly, terwyl slegs 32% van vroue met tabletrekenaars dit doen.
Mans soek ook meer gereeld na nuus op hulle toestelle, en is meer geneig om langer stukke te lees en video's te kyk.
– Volg Nuus24 op Twitter.
- AFP
