Mobiele kantoor in motor laat oë rek

2012-11-16 14:41

Die mobiele kantoor in Duitsland. (Saarland State Police, AP)

Berlyn – Duitse polisielede moes dié week twee maal kyk nadat hulle ‘n man aangekeer het wat ‘n hele mobiele kantoor in sy voertuig ingerig het.

Die Saarland-polisie het die 35-jarige man afgetrek toe hy 130 km/h in ‘n 100 km/h-sone gery het.

Die mobiele kantoor is op ‘n houtraam op die voertuig se passasiersitplek gebou, en spog met ‘n skootrekenaar, ‘n drukker, en ‘n omsetter om krag te verskaf.

‘n Navigasie-stelsel en 'n selfoon is ook aan die voorruit aangebring.

Die bestuurder was gelukkig om weg te kom met ‘n boete van slegs €120 (sowat R1 300), omdat owerhede nie kon vasstel of hy die toerusting gebruik het terwyl hy bestuur het nie.

– Volg Nuus24 op Twitter
 

- AP