Minister gepols oor skaliegas in Karoo
2011-04-21 07:37
Kaapstad - Suid-Afrikaners moet begin besef ontwikkeling en omgewingsbewaring is nié verlangse familie nie, het me. Edna Molewa, minister van omgewingsake en waterwese, Woensdag gesê.
Sy het in haar begrotingstoespraak oor omgewingsake gewaarsku dat “onvolhoubare ontwikkelingspraktyke” Suid-Afrika se ryk natuurlike hulpbronne finaal sal uitput en dat daar “niks vir die nageslag” oor sal wees nie.
Molewa moes gister opnuut bontstaan om die media en opposisiepartye se kommer te besweer oor Shell en ander maatskappye se aansoeke om na skaliegas in die Karoo met behulp van hidrouliese breking te soek.
Joernaliste het haar op ’n nuuskonferensie voor haar toespraak oor die kwessie gepols, terwyl Gareth Morgan, DA-LP, gedurende die debat gepleit het dat hidrouliese breking nié in Suid-Afrika toegelaat moet word nie omdat daar geen beleid daaroor bestaan nie.
Molewa was egter onwillig om by gesprekke oor skaliegas-eksplorasie betrokke te raak omdat sy as omgewingsminister later beslissings sal moet maak as appèlle oor sulke aansoeke ingedien word.
Opposisiepartye het gister deur die bank ’n beroep op Molewa gedoen om ’n leidende rol te speel om toe te sien dat lande wat vanjaar die Verenigde Nasies se klimaatsonderhandelings (Cop17) bywoon, wel uiteindelik ’n ooreenkoms bereik.
Suid-Afrika is gasheer vir Cop17, wat van 28 November tot 9 Desember in Durban plaasvind.
“Durban is ons laaste kans om ’n ooreenkoms reg te kry,” het Lance Greyling (OD) gesê. “Ons moet druk op die lande uitoefen wat nie met hul koolstofdioksied-intensiewe bedrywighede wil ophou nie.”
Sandy Kalyan (DA) het gesê niks minder nie as ’n regsgeldige ooreenkoms is aanvaarbaar.
Kalyan het die parlement egter ook gekritiseer as ’n instelling met ’n “reuse-papierspoor”.
“Is dit nodig om elke dag ’n komiteeprogram van 17 bladsye te publiseer? Of ’n ordelys van 10 bladsye?
“En die gebottelde water met die parlement se etiket op? Wat is fout daarmee om water uit ’n glas te drink?”
Volg Nuus24 op Twitter
- Die Burger