Minder testosteroon, meer hartprobleme
2011-11-02 12:14
Melbourne – ‘n Nuwe studie het bevind soos ouer mans se vlakke van die hormoon testosteroon verlaag, verhoog hul kanse om aan hartkwale te sterf.
Die navorsers het meer as 3 600 bejaarde mans vyf jaar lank bestudeer.
Minstens 6% van die mans het gedurende die vyf jaar aan hartkwale gesterf en mans met lae testosteroonvlakke was merkbaar meer geneig om as gevolg van hartprobleme te sterf.
Die navorsing, wat in die Journal of Clinical Endocrinology & Metabolism gepubliseer is, het ander bydraende faktore, soos ouderdom en bloeddruk, in ag geneem.
Die navorser Zoe Hyde van die Australia Center for Health and Aging het gesê dié faktore kan egter nie die verskynsel verduidelik nie.
“Daar is bewyse dat testosteroon ‘n goeie uitwerking op kardiovaskulêre gesondheid het,” het sy gesê. “Testosteroon word verbind met minder liggaamsvet en het ook ‘n positiewe effek op cholesterolvlakke.”
– Volg Nuus24 op Twitter.
- Reuters