‘Minder SA'ners sterf aan Vigs’
2011-08-26 11:00
Pretoria – Die aantal mense wat in Suid Afrika met die MIV-virus leef het effens tot 5.38 miljoen geval en die Vigs-sterftesyfer begin ook daal, het die adjunkpresident Kgalema Motlanthe gesê.
Suid-Afrika het meer MIV-gevalle as enige ander land ter wêreld.
Die Verenigde Nasies het bereken sowat 5.6 miljoen Suid-Afrikaners het in 2009 met die MIV-virus geleef.
“Suid-Afrika belê ‘n groot hoeveelheid hulpbronne in die stryd teen MIV,” het Motlanthe in ‘n verklaring gesê.
“Die sterftesyfer as gevolg van MIV-verwante kwale daal ook effens weens die land se uitbreiding van antiretrovirale behandeling,” het hy bygevoeg.
Hy het gesê die regering skat dat 10.6% van die land se 50 miljoen mense met die MIV-virus besmet is, waarvan 16.6% tussen die ouderdom van 15 en 29 is.
Suid-Afrika se program vir antiretrovirale behandeling is die grootste ter wêreld en sowat 1.4 miljoen mense ontvang tans behandeling.
– Volg Nuus24 op Twitter.
- AFP