Miljoene dalk hul data kwyt
2012-01-31 12:05
Owerhede wat aanvoer dat die lêerdeel-webwerf Megaupload by onwettige bedrywighede betrokke is, het gesê data van dié webwerf se gebruikers kan teen Donderdag reeds uitgewis word.
Die data wat uitgewis sal word sluit ook wettige lêers in.
Sewe mense agter dié webwerf, waar gebruikers onwettige kopieë van rolprente, musiek en ander media kan berg, is vroeër Januarie in hegtenis geneem omdat hulle volgens owerhede 'n "internasionaal georganiseerde kriminele bedryf" bestuur het.
"Ons verstaan dat maatskappye wat die data berg so vroeg as 2 Februarie 2012 al kan begin om die lêers op hul bedieners uit te wis," het Neil H. MacBride, 'n regsverteenwoordiger, in 'n hofdokument gesê.
Die hofdokument, wat Vrydag in Virginië ingedien is, het gesê ondersoekspanne van die Amerikaanse regering het reeds persele besoek waar Megaupload en MegaVideo se lêers geberg is.
Die regering het volgens MacBride van die data gekopieer, maar dit nie verwyder nie.
Regsverteenwoordigers vir Megaupload, wat 'n hoofkantoor in Hongkong het, het die aantygings teen die maatskappy ontken.
Hofdokumente beweer dié webwerf het kopiereghouers van honderde miljoene rande se inkomste ontneem, terwyl die maatskappy agter die webwerf op sy beurt honderde miljoene uit sy bedrywighede verdien het.
– Lees hier meer.
– Volg Nuus24 op Twitter.
