Miljardêrs kondig wetenskap-prys aan
2013-02-21 14:46
San Francisco – Van die wêreld se bekendste tegnologiemiljardêrs, insluitend Sergey Brin, mede-stigter van Google, en Mark Zuckerberg, Facebook se stigter en uitvoerende hoof, het Woensdag ‘n prys ter waarde van $15 miljoen (sowat R134 miljoen) aangekondig vir baanbrekerprestasies in lewenswetenskap.
Die Breakthrough Prize for Life Sciences is geskep om opgewondenheid te wek vir uitstaande wetenskaplike prestasies.
Die prys is ook daarop gemik om finansiële belonings soortgelyk aan sportsterre s'n aan wetenskaplikes te gee.
Die prys is vanjaar aan 11 wetenskaplikes wat navorsing oor kanker en genetika doen, toegeken.
“Ons is opgewonde om wetenskaplikes te ondersteun wat groot dink, risiko's neem en ‘n beduidende impak op ons lewens gemaak het. Hierdie wetenskaplikes moet huishoudelike name in ons gemeenskap wees,” het Anne Wojcicki, direkteur van die Breakthrough Prize for Life Sciences, en eggenote van Brin, gesê.
Die prys is vanjaar toegeken aan Cornelia Bargmann, David Botstein, Lewis Cantley, Hans Clevers, Napoleone Ferrara, Titia de Lange, Eric Lander, Charles Sawyers, Bert Vogelstein, Robert Weinberg en Shinya Yamanaka.
"Ons glo dat die Breakthrough Prize in Life Sciences die potensiaal het om 'n platform vir ander modelle van filantropie te skep, wat mense in staat sal stel om 'n geleentheid tot 'n beter toekoms te kry," het Zuckerburg gesê.
– Volg Nuus24 op Twitter
- Sapa-DPA
